Wednesday, October 16, 2013

දිනක් ඒවිද යලිත් පෙම් සුවය විඳින්නට.....


















වියලුණු දෙතොල් මත
තෙතමනක් රඳන්නට
තෙත් වූ නෙත් කෙවෙනි
වියැලිව හරින්නට

ඉරි තැලුණු බිමි කඩට
සිහින් වැහි වසින්නට
ඇළ දොළද ගං පිරි
ඉතිරිලා ගලන්නට

නොපිපි මල් කැකුලුවල
පිපි සුවඳ රඳන්නට
ඉපල් වුණු අතු රිකිලි
කොළ මලින් පිරෙන්නට

නොපිරි කුස පොත්තමත
බත් ඇටක් පිරෙන්නට
සෙනෙහසක් අවැසි විට
සෙනෙහෙසක් පුරන්නට

සැඩ සුළං හමාගොස්
මද පවනෙ නටන්නට
දිනක් ඒවිද යලිත්
පෙම් සුවය විඳින්නට.....

Monday, August 19, 2013

මල තලා රොන් ගනී මී මැසි







නිසල දියමත නැගෙන පෙණ පිඩු 
සුළං රැළි වැද නටයි වැටි වැටි
නැගෙන බිඳෙනා රලෙහි හැපි හැපි
ඉරුගෙ රැස් යයි එතී දියඹෙහි

සිනා සරකින් නැගෙන මදහස
දෙතොල්පෙති මත රඟයි දිලි දිලි
දෙකම්මුල් මත සැදෙන සුළියක
නොකී රහසක් වීය බිඳි බිඳ

පාට මලකට ඇදෙන මී මැසි
කැලත විත් රඟ දෙමින් ඉගිලෙති
මලේ ඇති රොන් ටිකෙන් ටික ගෙන
මල තලා රොන් ගනී මී මැසි

Saturday, August 10, 2013

එයින් විසිතුරු නුඹේ වතනම් ඇත්තටම මනරම්

හිස් අහස් කුස වළාකුළු ගෙන නුඹේ ගතවට               දවටමි
දුහුල් සළුවක් වගේ ඔතමින් ගතට ලස්සන             ගෙනඑමි
දිදුල තරු කැට පොකුරු අතරින් එළිය ඇති තරු     ගන්නෙමි
එවන් තරු කැට දෙකක් අරගෙන නුඹේ කන් පෙති     සරසමි

රන් තැටියවන් රවුම් සඳ දැක සිනාවෙන් මුව          පිසිනෙමි
එවන් සඳගෙන නුඹෙ ලමැදේ රන් මලක් ලෙස          දවටමි
රැයේ පිණිබිඳු තුෂර කැට ගෙන නුඹේ ගෙලවට          දවටමි
පැණින් මුකුලිත නුඹේ දෙසවන් අසා ඉන්නට           ලංවෙමි

අඳුර බිඳගෙන වලා අතරේ නැගෙන සඳ                  මනරම්
සඳේ එළියට ඉඟි බඳින්නට පිපෙන තරු                  මනරම්
නැගී බැසයන සඳට ඉඩදෙන වළාපෙල                   මනරම්
එයින් විසිතුරු නුඹේ වතනම් ඇත්තටම                  මනරම්



Tuesday, June 18, 2013

මඟ බලා සිටිමි

මල් පිරුණු ඇහැළ ගහ වටකරන් කහපාට මල් අදත් වැව රවුමෙ       පිපෙනවා
බොඳ වේචිචි මීදුමක් ඇවිත් හිමිහිට හොරෙන් ලතාවට මහ පොළොව   සිඹිනවා
සීරුවෙන් පායාපු හඳ එළීය මැදි කරන් තරු රෑන දිලි දිලි                  නිවෙනවා
කොහොම ඔබ කියූවත් මගේ හිත ගැබ්බරයි ඒ නමින් සෙනෙහෙ මල් පිපෙනවා

පාලු රෑ පුරාවට සඳ තරුත් මැදි කරන් ජීවිතය හෙමි හෙමින්            ගෙවෙනවා
දුහුල් සළු තිර මතින් ඇවිත් නල ගැටි ගැටී මගේ හිත සුසුමකින්        තෙමනවා
රාත්‍රිය අදුරකින් වැසී ඇති වෙලාවට සුරඟනන් පෙම් කතා                 කියනවා
ඒ කතා අහන්නට අනේ නුඹ හිටියනම් මට මෙහෙම දුකක් නැහැ       සිතෙනවා

පින් පිරුණු ආත්මය හොවාගෙන පපු තුලම උණුසුමින් මගේ හිත       තෙමනවා
නෙත් පියන්නට බයයි හීනෙකින් ඔබ ඇවිත් ඇහැරවන බවක් තව     දැනෙනවා
මේ සොඳුරු රැය පුරා නෙතු අසල දැවටිලා ඔබ ඇතැයි ඔබ ඇතැයි     හැඟෙනවා
මේ හීන මල් පොකුර විකසිතව හිනැහෙනා දිනය කවදද කියා           හිතෙනවා

Monday, June 17, 2013

සබඳ අපි ඇවිද යමු

සබඳ අපි ඇවිද යමු
මේ නුහුරු මාවතේ
මුණගැසෙන තුරු තවත්
පෙම්වතුන් මේ වගේ...
ඉර එළිය වැටෙනතුරු
හිම කැටිති දියවගොස්
අතින් අත පටලවා
සිනාසෙමු සිත් ලෙසින්...
රෑ අහසේ තරු කැලත
දිලී බබලන විටෙක
සඳ එළිය සොයා ගොස්
ගතු කියමු සීරුවට...
නුබ ගැබේ වළාකුළු
කැටිති ලෙස පෙල ගැසී
වැහි බිංදුවක් ලෙසින්
පාත්වන තුරු බිමට....
මල් පිපී සුවඳ දෙන
හිමිදිරියෙ ඇවිදයමු
මේ පාළු මාවතේ
එළිය දකිනා රිසින..
බිම් කරුවල වැටීල
අඳුරකින් වැසෙන කොට
සුසුම්ලමු එක්වෙලා
අතීතය ගැන තවම...
මේ තරම් දුර උනත්
යන්න ඇති දුර අපට
යා යුතුය නොනැවතී
ඉසිඹුවක් ලබන්නට..
හීනයක දැවටිලා
සොඳුරුවූ දිගහැරුම
එනතුරා බලාඉමු
දුකක් නැහැ නොවැ සිතට.



Saturday, June 15, 2013

ජීවන ගඟ


















එකම දිනයක සතුට එකතුව
දවස් සති මස් ගෙවෙනවා
සිතේ සතුටින් පුරෝගත් හද
උණුසුමින් වගෙ පිරෙනවා....

ඉඳහිටක දවසක අතරමග
බොරපැහැති දින තියෙනවා
නෙත් අගට කඳුලක් පුරෝගෙන
සිනාසීගෙන සිටිනවා...

දුත සතුට සැප මැදින් ජීවන
ගඟ ගලාගෙන බසිනවා
ගල් බොරළු කඳු හෙල් මතින් බට
ගඟ සුයුර වෙත ඇදෙනවා...

දහසකුත් බාධක අභිමුවෙහි
අපේ ජීවිත ගෙවෙනවා
ගෙවෙන හැම දිනයක්ම වාගේ
සොඳුරු බව නම් සිතෙනවා.

Thursday, June 13, 2013

ඔබ මා


දෑසට හමුවන එකම සඳක් යට
එකම ඉරක් යට එක හෝරාවක
අප පිය මැන්නා එකම මඟක් වෙත
යළි ආපසු නෙතු නොහැර බලා....

පායා ආ මුත් ගගනත වටකොට
තරු මල් වැටිලා සිනහසලා
අපි පියමැන යන මාවත එළියයි
සුදු සඳරැස් දහරින් තෙමිලා...

පිපී සුවඳදෙන කොඳමල් අතරේ
මදනල විසිරී පැතිරෙයි දසතේ
සිත්විල පහනින් එළිය කරනු මැන
තව දහසක් මල් පිපෙණු බලා.

Thursday, June 6, 2013

කවිය


ලස්සනයි
හැඩයි
සුමුදුයි
සුසිනිදුයි
.
.
.
.
කටුකයි
කඨෝරයි
නීරසයි
දුක්බරයි
.
.
.
.
ඒත්

හැම එකම
.
.
.
.
.
විචිත්‍රයි
අලංකාරයි
හැඩයි
සිත්ගන්නා සුළුයි.

Sunday, June 2, 2013

සඳ වතුරේ පෙණ පිඬු මැද
හිනැහුණු සුදු සාවියේ
නුඹත් එක්ක එක මොහොතක්
කතා කරනු බැරිදෝ.....
හිම කඳු යායක් අතරින්
පාත් වෙලා එකම විටක්
නුඹේ දෙතොල් පෙති හිමිහිට
සිපගන්නට අවසරයි...


හීන හතක් මැදින් ඇවිත්
කවුළු දොරින් එබී බලන්
සිහින තොටිල්ලට ගොඩවී
සිනා නගන්නම්
ඔබේ සිනා දැක ගන්නට
පෙරුම් පුරන්නම්...

ආකාසේ රන් පැහැයට
දිදලුන රන් වන් අසපුවෙ
කවුළු පියන් හැරදාලා
තබලා තියන්නම්...ආයෙත්
මගේ හීන නොදකින්නට
පෙරුම් පුරන්නම්
හද මැදුරේ ගී කියනා කුරුල්ලනේ
නිහඬව ඉන්නම්.

Saturday, May 25, 2013


හිතේ ගුලිකර නෙතේ සඟවන්
ගී කියන
කඳුලු කිරිල්ලී

නුඹේ ගීතය
අසා දැනඋන්
කෙනෙක් වේනම්
මමයි ඒ කුමරා

හාදු වැස්සක්
අරන් ඇවිදින්
ගිම්හාන සැන්ඳැවේ
සිත තුටින් තෙපලූ

වැහි වළාවක එතී
අහස් තලයේ නැගී
දඟ කරන වැහි බිංදුවේ
මමයි ඒ කුමරා.

Sunday, May 19, 2013


ගතු නොකියමි බමරිඳුනි....






සඳ ඇති රැයෙක
පිපුණු
කඩුපුල් මලක
රොන් රස විඳින
බමරෙක්මි...



පෙති කඩා හල මල
හඬද්දි දුකින්
විඳි රස රැගෙන
ඉගිලුනා සැණෙන
ඉසිඹුවක් ලදින්
වෙන මලක් වෙතට...

කඩුපුලේ රැඳුනු
රොන් වලින් මත්ව
ඒ මලේ පෙතිද
කඩා හල විටක
හැඬුවෙ නැහැ එමල
නෙතේ රැඳි කඳුල
සැඟවුවා විගස..

Sunday, March 17, 2013

හදවිල කළඹා මියැදුන සිහිනේ
බොල් පිණි අහුරක් මත රැඳුනේ
සිව් වසරක පෙම් බැඳුනු අතීතය
අද ඇයි මේ විලසට බිඳුනේ..

පිපි තඹරුව දැක හිනැහෙන බිඟු ලෙස
ඇයි මා හද ගැඹුරට ඇදුනේ
ඒ බැඳි සෙනෙහේ වරපට ලෙහමින්
කිම ඔබ අද වෙනතක ඇදුනේ

මුවගින් ගිලිහුණු ආදර පද වැල්
දෝංකාර දේ මගෙ මනසේ
පන්හිද ගොලුවී සිතුවිලි සිරවී
ජීවිත ඟඟ මැදියම නැවතේ

සෙනෙහෙ තොටිල්ලක දිවි අරඹන්නට
පැතුවත් පෙරදින ඔබ හමුවේ
අද වෙන්වී ඇත අපේ පැතුම් මල්
විසිරී ඇත  හැමතැන දසතේ


Tuesday, March 5, 2013

නිලුපුල ඔබයි සිත් විල කළඹන නිසල
බිමි කඩ ඔබයි කතරක දිය බිඳු ඉසින
ඉඳුවර දෙනෙත් තුල නිකැලැල් බව සිඹින
සෙනෙහස කොහේ සැඟවි යා දෝ විටෙක

ඉරබටුවකින් අසමින් මග ගෙවා දුර
වළාකඩින් වසමින් හිරු කිරණ මැඩ
නොපෙනෙන තරු පොකුරු මැද හිඳ සිනාවෙන
සිහසුන ඔබයි සෙනෙහේ දිය සතපවන

මාලති මලින් මල්කම් කර කැටයමට
විලිකුන් පඳුරකින් තොරණක් ගසා හැඩ
සියොතුන් ඉගිලයනවිට දසතම පැතිර
ඔබමයි මගේ හදවත දිනු සෙනෙහෙ විල

Sunday, March 3, 2013

විඳින්න ඇත්නම්...

කවුළු පියන් පත් අතරින්
සඳරැස් වැටිලා දිලිසෙන
සීත රැයේ හිමින් හිමින්
ඔබ වෙත එන්නට ඇත්නම්
ඔබේ සුවඳ එක මොහොතක්
විඳින්න ඇත්නම්

සුමුදු සේද ඇතිරිලි මැද
සුවසේ නිදනා පය මුල
මොහොතක් වැතිරි නින්දක්
නිදන්න ඇත්නම්,මොහොතක්
සිතන්න ඇත්නම්

සිහිනෙන් ඔබ මුමුණන විට
හිමන් සැරේ සවන් යොමා
පුංචි සද්දයක් නොකරම
අහගෙන ඉන්නට ඇත්නම්
හීන් සිනාවක් මුවඟෙහි
නගන්න ඇත්නම්

කවුළුව අතරින් හිරු රැස්
මෝදුව එනවිට හිමිහිට
අවදිව ඉන්නම්
ඔබේ සුවඳ රැඳි කොට්ටය
තුරුලට ගෙන එකම වරක්
සිඹින්න ඇත්නම්.

Friday, February 1, 2013

ඔබ සහ මම


ඔබ


ලස්සන කතාවක් කියනවා වගේ
එක හුස්මට කියවගෙන ගියා



මම

ඒ ලස්සන කතාවට හූමිටි තිය තිය
අහගෙන හිටියා

ඔබ

හීන් මුදු සුවඳක් එක්ක කාමරයම පුරවන්
හිමින් සැරේ ගෙට ගොඩ උනා

මම

දහඩිය ඟඳ එක්ක ගෙදරට ගොඩවෙනකන්
බලාගනෙ හිටියා ඒ සුවඳ විඳගන්න

ඔබ

සුව පහසු ඇඳේ පැත්තකට හැරිලා 
හරි සනීපෙට නින්දට යනවා

මම

රෑ පුරාම හූල්ල හූල්ල ඔබ ලඟින් වැතිරිලා
කඳුලු බොනවා

ඔබ

දකින ලස්සන ලස්සන හීන වලට
හීනෙන් හීනා වෙනවා

මම

දැකපු හීන වලට හිනා වෙන දිහා
වෙන කරන්න දෙයක් නැතුව බලන් ඉන්නවා.

ඔබ

දුර ගමනක් යන්න ආවත්
අතරමග නැවතිලා ඉන්නවා

මම

නවතින්න බැරි නිසා 
ඒ ගමන තනියෙම යනවා.

Wednesday, January 30, 2013

සිතුවම





නොයෙකුත් පාට තවරා
අඩු වැඩිව

උස්වූ තිසර තුඩු
පෙකනියද 
ඉඟ සුඟඳ

අඩ නිරුවත්ව දඟලයි
මහ මග දෙපස

බලන්නට සිතුවත් කෙලින්
බලන්නට නොහැකිවම
හොරෙන් බලමින් යන්නෝය
මිනිසුන් දෙපස

නිරුවත් ගැහැණු රුව දැක
මොහොතක් නතර විය නෙත
පරදවයි දිවි අප්සරාවන්
ඇගෙ රුව

අහෝ....

කෙතරම් අලංකාරද
සිත්තරුන් මැවූ ඒ 
සිතුවම

විහාරමහා දේවී උද්‍යානය දෙපස කලා පොළක් විය පසුගිය ඉරු දින.


සුභාෂිණි ගුණවර්ධන

Sunday, January 20, 2013

ආසයි මම නුඹෙ උණුසුම ලඟම රැදෙන්න

සීතල අතරින් පෙරි පෙරි මීදුම් සිරි ගලන වෙලේ
කවුලුව අතරින් ඇවිදින් හිනැහී යන්න
සිහිනෙන්වත් හෙමින් සැරේ නුඹෙ දෙනුවන්
තුලම රැඳෙන්න
ගී කියනා කුරුල්ලන්ට රස රහසක් කියාදෙන්න
කුරුල්ලනේ නුඹලා ගී ගයනවා නේද
ආසයි මම ඒ ගීතය අහගෙන ඉන්න...

වළා පෙලින් එහා සඳේ ආවාටය මැද හිඳගෙන
පොළෝ ගැබට බැලුම් හෙලන්න
තරු පොකුරක සැඟවීගෙන
ආයෙත් එක සැරයක්වත් ඇවිදින් යන්න
නුඹේ සුසුම් පොදින් නැහැව
ජීවිත ඟඟ ගලාන යන්න
ආසයි මම එකම වරක් ඔබව දකින්න...

දුරුතුමහේ සීතල මැද කිටි කිටියේ දෑත් බැඳන්
ඔබත් එක්ක මල් පාරේ ඇවිදන් යන්න
නිසල විලට වැටි මල්වල සුවඳ රදන්න
ඒ විල මැද මානෙල් මල විලස හිඳින්න
සීතල උදයක සුපිපුණු නුඹෙ කම්මුල් දෙක අතරින්
එකම වරක් තොල් පෙති මත තිලක තියන්න
ආසයි මම නුඹෙ උණුසුම ලඟම රැදෙන්න