මගෙ සිරි ලංකා භූමි තලේ
අද ජයමංගල කෝළ හලේ
පහ කළ පරගැති රාජ බලේ
නමෝ නමෝ මාතා බැබලේ
සිරිලක් අඹරෙහි නැඟ නැඟ දිව්
නිදහස් කාහළ මංගල රැව්
පිදුරුතලාගල සමණොළ පව්
මිහිදුම පැහැ ගෙන සිඹිනු බලව්
විදෙසික පීඩන ගිම් උනවා
නිදහස් මඳනල රැළි දෙනවා
ලක්මව රන්කොඩි ලෙළ වනවා
මෙන් සිරිමා බෝ දලු ලනවා
යුධ වැද රැකුමට හෙළ භූමි
එය සිඹගෙන මළ ලෙස දෑමී
කැප්පෙටිපොළ හිස රණ කාමී
නිදහස දැක වනි මවු භූමී
පෙබරවරිය සිවුවැනි දවසේ
මගෙ මළ මවු ඉපදුණු දවසේ
නව හිරු නව සඳ නුබ දිලිසේ
හෙළ දද රඟ ගති උඩ අහසේ
පෙණකැටි මුතුපට ඉහළට නංගා
රළ පෙළ තරඟෙට වෙරළට නැංගා
පළකොට නිදහස සතුටු තරංගා
හෙමිහිට බැසයෙති ගිං කළු ගංඟා
හැම ළය පතුළක ජාතික ජීවේ
නළියවමින් සිහිලළ නල ආවේ
පන්සල, පල්ලිය, ඝණ්ඨා රාවේ
නිං නඟමින් උඩුගුවනෙහි ගෑවේ
නිදහස පිළිබඳ දිමුතු ජයන්තිය
සළකන ඔබ අද හරි පින් වන්තිය
කිය කිය දිවගෙන සිඳුරළ පන්තිය
සිඹගති සිරිලක් ආදර වන්තිය
සුගුණපාල සමරසේකර
No comments:
Post a Comment
කවි ලියන්නකුට ලැබෙන අදහස්, ප්‍රතිචාර ඔහුට තව තවත් නිර්මාණ කිරීමට පොළඹවනු ලබයි..................